Instituto Ourensán de Desenvolvemento Económico
Rúa do Progreso, 28 - 32003 Ourense
Tlf: 988 317 930 / 988 391 085
inorde@inorde.com

A fundadora e presidenta de “Spain Startup” destaca a importancia de que políticos e institucións “desenvolvan iniciativas innovadoras a prol da eficiencia, en favor dos cidadáns”
 
Manuel Baltar inaugurou a xornada “A aventura de emprender” afirmando que Ourense “destaca pola súa cultura e tradición do emprendemento, orixinada na nosa razón de ser como pobo emigrante, traballador e creativo”
 
Ourense, 30 de xuño de 2015.- O presidente da Deputación de Ourense, Manuel Baltar, inaugurou hoxe no Centro Cultural “Marcos Valcárcel” a Xornada Star-up “A aventura de emprender”, na que se analizaron experiencias de empredemento, modelos de negocio, mercado e marketing. O presidente do goberno provincial estivo acompañado por María Benjumea, fundadora e presidenta de “Spain Starup”, e por Antonio Villaverde, vicepresidente da Cámara de Comercio de Ourense.
 
María Benjumea, creadora e impulsora do maior foro mundial de investidores e emprendedores, o “Spain Startup The South Summit”, que se celebra en Madrid, destacou o papel que está a xogar a Deputación de Ourense no ámbito da innovación e de modernidade na xestión, afirmando que os proxectos que está a desenvolver nos ámbitos da administración electrónica, o medio ambiente, a competitividade e ou mesmo a cooperación cos concellos “é un exemplo de innovación que debería trasladarse a outras deputacións de España”.
 
Benjumea, que na pasada edición do “Spain Startup The South Summit” reuniu a 7.000 persoas de 34 nacionalidades, das cales máis de 2.000 eran empresas e investidores que coñeceron as ideas de 3.500 emprendedores, subliñou que “o marcado carácter innovador que está a demostrar a Deputación de Ourense é unha boa proba de que os políticos e as institucións deben achegarse cada vez máis á innovación, en favor dunha maior eficiencia da xestión a prol dos cidadáns”.
 
Pola súa banda, o presidente do goberno provincial inaugurou a xornada afirmando que Ourense “destaca pola súa cultura e tradición do emprendemento, orixinada na nosa razón de ser como pobo emigrante, traballador e creativo”. Manuel Baltar agradeceu a María Benjumea a súa presenza neste encontro de emprendedores “porque ela é o vivo exemplo de como crear proxectos e crer neles, unha filosofía que encaixa perfectamente na liña estratéxica da Deputación de apoio á competitividade e ao talento en Ourense, unha provincia que é modelo de emprendedores en moitos de ámbitos, entre os que destacan o deseño textil, a industria da automoción e o cooperativismo no sector agroalimentario”.
 
Tamén se referiu á importancia de combinar emprendemento e innovación o vicepresidente da Cámara de Comercio, Antonio Villaverde, ao afirmar que son claves “para o desenvolvemento nos novos ámbitos empresariais”. Villaverde destacou a colaboración entre o Inorde, a Cámara e a Fundación Incyde, “que fixo posible levar a cabo na provincia de Ourense tres programas de creación e consolidación de empresas nos que se impulsaron 80 proxectos”.
 
“A aventura de emprender”
 
A xornada de hoxe, organizada pola Deputación de Ourense a través do Inorde e a Fundación Incyde, coa colaboración de “Spain Startup” e da Cámara de Ourense, tivo como obxectivo reunir a empresarios e emprendedores ourensáns vinculados ao mundo da innovación e a creatividade aplicada aos negocios para que contasen as súas experiencias e analizaran a situación actual, ofrecendo claves para converter ideas en proxectos reais.
 
O encontro comezou cunha “conversación inspiracional” baixo o título de  “Como volver emprender e non morrer no intento?”, a cargo de María Benjumea e Miguel Caballero, fundador de Tutellus. María Benjumea animou tamén ás startups ourensás a participar no próximo South Summit, que terá lugar na praza de touros das Vendas (Madrid) os días 7,8 e 9 de outubro. Este encontro reunirá nun mesmo escenario aos principais fondos de investimento internacionais e ás corporacións máis innovadoras. Posteriormente, desenvolvéronse relatorios sobre emprendemento e nnovación, e un taller que analizou o tema: "Do deseño do modelo de negocio ao seu desenvolvemento no mercado; o go-to-market strategy", a cargo de Marcos Eguillor, Profesor do IE Business School e experto en negocio dixital.
 
 
 
 
 
O pasado 25 de xuño de 2015, o presidente da Deputación de Ourense, Manuel Baltar, presentou hoxe no Centro Cultural Marcos Valcárcel o 6º informe do Observatorio Económico Ourensán, unha ferramenta que a institución provincial desenvolve para a análise económica, laboral, empresarial e social da situación económica da provincia ourensá nas súas comarcas. O Observatorio nace da implicación das institucións (Deputación e Inorde), a universidade e o ámbito empresarial, e na súa elaboración intervén un equipo multidisciplinar de profesionais e universitarios especializados, coordinados polo profesor Andrés Mazaira.
Este sexto informe do Observatorio constata que nove comarcas e 57 concellos xeraron emprego neto no último ano, e que a provincia de Ourense impulsa e asenta emprego a un ritmo anual do 1,2 %, tendo un 10 % menos de paro xuvenil que ao inicio da crise.
Manuel Baltar destacou que o Observatorio é unha ferramenta relacionada coa planificación, o compromiso e a responsabilidade, tres actitudes obrigadas na xestión pública. O presidente do goberno provincial subliñou que no ámbito demográfico, unha das novidades do Observatorio, temos que ser áxiles e constantes, pois estamos nun punto de inflexión no que a demografía ten que marcar a dirección das políticas locais, provinciais e estatais. Tamén destacou Manuel Baltar neste intre, no que as 92 corporacións municipais e a Deputación de Ourense están a perfilar a folla de ruta de catro anos decisivos para construír a provincia dos novos retos e a provincia da nova velocidade, o Observatorio Económico pretende ser unha guía para o deseño e un referente para a toma de decisións. Os datos e a súa interpretación teñen en non poucas ocasións a chave mestra para marcar os tempos na política e na xestión das administracións, e remarcou que no tocante á Deputación, en canto remate o proceso de constitución xa estará lista para a súa aprobación a estratexia de desenvolvemento urbano sostible, é dicir, o maior garante de futuro para o conxunto da provincia, onde quedarán recollidas as liñas de acción de catro proxectos xurdidos do Ourense máis creativo, do Ourense máis innovador, do Ourense máis imaxinativo e do Ourense máis orixinal. Estas catro propostas de acción son o Plan Ourense Provincia Termal; o Plan de Competitividade das Pemes; o dobre proxecto de Provincia Intelixente e Administración Electrónica; e a Axencia Provincial da Enerxía e do Medio Ambiente, coa que volveremos ser pioneiros en España.
 
 
A estación de Baños de Molgas (Ourense) converterase entre o vindeiro 28 de xuño e o 11 de xullo no escenario perfecto para recrear os relatos da escritora Agatha Chritie co desenvolvemento do Orient Express in Ourense, un campamento de verán no que participarán nenos e nenas de entre 11 e 16 anos, que ten como obxectivo a inmersión no idioma inglés por medio de actividades de lecer e formativas baseadas na creatividade audiovisual. Os trinta nenos e nenas que participarán no campamento aloxaranse no albergue que o Inorde ten na estación de Baños de Molgas, e completarán as dúas semanas de estancia con excursións, rutas de sendeirismo e actividades deportivas, turísticas e culturais.
A Deputación de Ourense promove e colabora nesta iniciativa a través do Inorde para fomentar a convivencia e a formación dos xóvenes xunto coa promoción dos espazos naturais da provincia de Ourense.  
 
O próximo xoves, 25 de xuño ás 11:30, terá lugar no salón de actos do Centro Cultural Marcos Valcárcel a presentación do sexto estudo do Observatorio Económico Ourensán por parte de Deputación de Ourense.  
O Observatorio Económico Ourensán é unha ferramenta empregada pola Deputación de Ourense e que ten como finalidade realizar unha análise económica, laboral, empresarial e social da situación económica da provincia ourensá e cada unha das súas comarcas. O Observatorio nace da implicación das institucións (Deputación e Inorde), a universidade e o ámbito empresarial, e na súa elaboración intervén un equipo multidisciplinar de profesionais e universitarios especializados.  
 

Agenda [+]

<<   Julio   >>
 
 
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
 
 
Promercado
Regenera Limia

07-07-2015 | © Inorde

ACV Galaica